A partir dal december datti bunamain l'entira fin d'emna ina colliaziun tranter Turitg e Cuira – en tact da mes'ura. Plinavant datti dus trens directs da Cuira fin a Genevra, cun fermadas a Losanna e Berna. Uschia vegnia il Grischun collià directamain cun la Svizra franzosa, scrivan las Viafiers federalas en ina communicaziun.
Midadas en l'ulteriur pajais
Er uschiglio han las Viafiers federalas augmentà colliaziuns en regiuns turisticas. Uschia datti mintga duas uras in tren direct tranter Romanshorn ed Interlaken. Era il Tessin è collià meglier, cun dapli trens envers il sid il venderdi, ed en la direcziun cuntraria la dumengia.
Plinavant rapporta las Viafiers federalas in cler augment dal dumber da pendularias e pendularis. Perquai na vegnan trens da levgiament betg stritgads sin las lingias Turitg – Berna e Turitg – Lucerna.
