Oz vivan e lavuran radund 2'000 persunas a Cuira Vest. Il Masterplan Cuira Vest vul trair a niz pli fitg il potenzial da quest areal e sviluppar vinavant el. En il futur duess Cuira Vest porscher plaz da viver e lavurar per radund 6'500 persunas.
Divers spazis cun differents scopos
En il concept vegn l’areal da Cuira Vest repartì en otg secturs ch’han mintgamai in concept cun agen caracter. Tranter auter per exempel in da furmaziun e lavur cun la Scola auta spezialisada dal Grischun, in da far cumpras cun il City West, l’administaziun cun la Sinergia e spazi d’abitar. En l’entir areal da Cuira Vest duessi er dar divers spazis verds. En mintga sectur duessi dar spazi per ina fin duas chasas autas ch’èn pli autas che 25 meters. Per promover il traffic public duessan ils parcadis vegnir limitads.
Ferm augment dal traffic da tren
Il masterplan prevesa plinavant in nov concept da traffic. Quel sa basa surtut sin la nova staziun da Cuira Vest che vegn bajegiada enfin il 2026. Il masterplan quinta che las frequenzas da la nova staziun Cuira Vest, pudessan s’augmentar dad oz radund 550 persunas sin 1'500 persunas che nizzegian la staziun ils onns 2035/2040. A lunga vista, fin ils onns 2050/2055 duess il traffic da la staziun da viafier schizunt cuntanscher 3000 persunas il di.
Concept da traffic
Per far pli attractiv il spazi public, duess la Comercialstrasse vegnir serrada e far plaz ad ina zona d’inscunter che duess vegnir embellida. Per ils velocipedists duessi dar ina ruta da velo directa dal center da Cuira fin Cuira Vest ed enavant fin a Domat. Uschia vul la citad da Cuira cuntanscher, ch’il diever dal velo s’augmenta dad oz 8% sin 20% a lunga vista. Il diever da l’auto duess sa reducir dad oz 65% sin 25% a lunga vista.
