Ils temps che fatschentas ed interpresas faschevan lur reclama oravant tut en televisiun ed en gasetta èn passads. Oz daventan surtut er las raits socialas sco TikTok ed Instagram adina pli interessantas per preschentar products e purschidas. U meglier ditg ils influencers e las influenceras che sa muventan en il mund digital e che han massa fans, ils followers sco quels han num en la lingua da las medias socialas.
Collavurar cun persunas che cuntanschan in grond public è damai attractiv. Quai han era scuvert las destinaziuns turisticas. Cooperaziuns tranter influencers/influenceras ed il turissem capita adina puspè. Nus declerain co quellas cooperaziuns funcziunan e tge ch'ellas portan.
Steve Merson – influencer da Turitg. In um giuven cun chavels colurads blonds, gronds egliers da sulegl cun vaiders blaus, ina giacca da tgirom – averta – e chalzers da gimnastica nairs, amez in territori da skis cun blera naiv. Quai è la situaziun da partenza dal video da reclama da 40 secundas per la cooperaziun da l'influencer turitgais Steve Merson cun Grischun Vacanzas ed il territori da skis Heuberge sur Fideris.
Per 200 da ses passa 300'000 followers, surtut uffants e giuvenils, ha il giuven influencer turitgais organisà in di da skis en il territori Heuberge sur Fideris. S'annunziads fissan perfin radund 500 persunas. Per puntar quai, collavura il influencer cun Grischun Vacanzas e la destinaziun «Fideriser Heuberge».
Yves Luetolf, il manader dal marketing e vicedirectur da Grischun Vacanzas declera pertge ch'els fan talas cooperaziuns cun stailettas da las medias socialas.
En il cas da Steve Merson dumagnain nus da cuntanscher ina gruppa en mira giuvna ed urbana. Ina che n’è betg mintga di en viadi en las muntognas. E nus sperain che quella gruppa survegn plaschair vi dal sport da naiv e ch’els ed ellas turnian en futur sco giasts fidaivels.
Quest di da skis per 200 giuvens e giuvnas na saja betg l'emprima collavuraziun cun influencers ed influenceras per far reclama per il Grischun. Dentant l'emprima giada ch'ins fetschia ina occurrenza cun envidar explicit followers d'in influencer.
In di da skis gratuit per 200 persunas tuna da bler raps. Yves Luetolf da Grischun Vacanzas metta quai en relaziun, en cumparegliaziun cun autras furmas da marketing saja quai ch'ins investeschia en l'influencer-marketing in pitschen post da custs.
Igl è ina pitschna part da noss mix da marketing. Nus ans muventain qua mintg'onn en il rom d’in import da tschintg cifras.
E l'influencer Steve Merson desistia d'in onurari. Uschia possian ils daners per quest event vegnir duvrads cumplainamain per pussibilitar a quella gruppa d'envidads ed envidadas in bel di en la naiv.
Tge che po esser in pau in ristg per fatschentas che fan talas cooperaziuns per events cun blera glieud è – tge ch'ils influencers e las influenceras fan giu cun lur followers. En il cas da l'event en il territori da skis ha Steve Merson per exempel nudà en las cundiziuns per sa participar, sper per exempel la cundiziun ch'ins stoppia esser perencletga ch'i vegnia filmà e fotografà, er ina clausula che scumonda da metter nà el u ils partenaris da l'event a moda negativa. Sch'ins cuntrafetschia a quai haja ins da pajar in chasti convenziunal da 5'000 francs a mintgina da las trais partidas. Grischun Vacanzas sa distanziescha da quella clausula.
Jau sun persvas che quella na dovri betg. Igl è ina cunvegna tranter l'influencer e sia community. Nus persunalmain essan per la libertad d'opiniun e nus essan persvadids ch'il paragraf na vegn mai applitgà, perquai che quai daventa segir in eveniment nunemblidaivel en las muntognas grischunas.
Sche talas clausulas èn usitadas tar cooperaziuns cun influencers ed influenceras, resta avert. Clar è però: Ellas sveglian dumondas da transparenza. Sche vuschs criticas vegnan exclusas cun in contract, resta lura insumma spazi per in'opiniun autentica? L'influencer Steve Merson sez n'è betg stà cuntanschibel per ina posiziun. E ses fans para la clausula cun il chasti pussaivel betg d'avair disturbà. Tge ch'ins vesa vi dal grond dumber d'annunzias.
E co valitescha l'Institut per turissem e temp liber da la Scola auta spezialisada dal Grischun (FHGR) il marketing cun influenceras ed influencers en il turissem?
Influencer è in fenomen fitg captivant. Gist avant in mez onn ha l'Universitad da Son Gagl publitgà in artitgel che di che marketing d’influencers na portia betg bler. E nus avain autras organisaziuns sco Svizra Turissem che han fatg atgnas elevaziuns e che vegnan tar in'autra conclusiun. Quellas suttastritgan l’impurtanza dal marketing d’influencers.
Ella agiunta che quai mussia che a la fin dal di stoppia mintga fatschenta sezza decider sche quest marketing cun influencers portia insatge ni betg.
Tar Grischun Vacanzas è ins en mintga cas persvadì, che quella furma da marketing porta fritg. Ins cuntanschia las gruppas giuvnas. Ed ins saja conscient che marketing d'influencers haja in caracter dispitaivel. Perquai tschernia ins fitg conscient cun tgi ch'ins collavuria.
