Il glindesdi damaun è il chapitel catedral sa radunà a Cuira. Sin la tractanda è stada l'elecziun d'in nov uvestg da Cuira. Ils canonis n'èn dentant gnanc entrads en la discussiun davart in successur da Vitus Huonder. Sco in insider ha ditg envers RTR, n'haja la maioritad conservativa dals canonis betg vulì eleger ina persuna d'ina glista cun candidats moderads.
Tenor Mariano Tschuor saja quai stà ina cuntinuaziun logica da l'istorgia da l'uvestgieu. Dapi l'elecziun da l'uvestg Wolfgang Haas l'onn 1988 haja dà dispitas internas ed indiscreziuns. Uss na saja la situaziun betg pli da schliar.
Quai dat uss natiralmain tut ina nova situaziun, che mo Roma sa schliar.
La balla è uss a Roma. Il papa pudess eleger in nov uvestg – in tenor ses gust. Tenor Mariano Tschuor ch'enconuscha bain la situaziun a Cuira, schabegia il proxim temp dentant anc insatge auter. I saja probabel che Roma fetschia ina visitaziun apostolica. Pia: il papa elegia ina persuna ch'analisescha e controllescha la situaziun en l'uvestgieu.
Restructuraziun dal territori
Il territori da l'uvestgieu da Cuira cumpiglia il Grischun, Turitg sco er ils chantuns Glaruna, Uri, Sviz, Sur- e Sutsilvania. La dumonda suenter ina nova organisaziun dals uvestgieus en Svizra pudess vegnir actuala. L'uvestgieu da Cuira datti tenor Mariano Tschuor mo pli sin il palpiri. La fidanza saja davent. Qua dettia la pussaivladad da metter ensemen novs territoris u dad empitschnir l'uvestgieu.
Tge che schabegia cun l'uvestgieu da Cuira è uss dentant en ils mauns da Roma, dal papa. Cun quai che Cuira è mo in da passa 4'000 uvestgieus sin l'entir mund, pudess quai dentant durar in onn u er pli ditg.
