Il cusseglier guvernativ Peter Peyer ed il manader da l'Uffizi da migraziun e dretg civil d'enfin uss, Marcel Suter, n'han betg pudì collavurar. Perquai ha Marcel Suter chalà sin giavisch persunal da ses schef Peter Peyer, sco lez ha ditg avant las medias. Suter bandunia ses post en enclegientscha vicendaivla. En cunvegnientscha cun il manader partent sajan ins era sa cunvegnids ch'il departament da giustia, segirezza e sanadad Peter Peyer stettia a disposiziun per infurmaziun e dumondas.
Nagins sbagls, «però cumplitgà»
Tranter auter ha Peter Peyer numnà la collavuraziun «cumplitgada». Marcel Suter n'haja dentant fatg nagins sbagls, ha Peyer accentuà. Dentant, sch’ins constatescha ch’ina collavuraziun na funcziunescha betg pli, saja quai necessari, da trair las consequenzas. Era il fatg che la separaziun saja capitada d’in di sin l’auter, na saja betg insolit en autas posiziuns. Ad interim surpiglia il vicemanader da l'uffizi Markus Haltiner il post. En il decurs da las proximas emnas vegnia la plazza scritta ora.
11 onns en uffizi
Suenter 11 onns en uffizi è Marcel Suter sa retratg ils 12 da december da ses post sco schef da l'Uffizi chantunal da migraziun e da dretg civil. El haja infurmà la mesemna passada ils ulteriurs commembers da la direcziun da l'uffizi, ch'el bandunia ses post l'entschatta da l'emna. L'uffizi veglia s'orientar da nov, scriva il chantun en ina communicaziun. Ins veglia metter il focus anc pli fitg sin ils servetschs per la populaziun estra e sin l'integraziun da tala.
Or da l'archiv