Or da trais servetschs a l'ospital daventan dus pli lungs: ed entant resta la paja medema. Uschia descriva Angelica Signer la situaziun. Ella è presidenta da l'Uniun grischuna da spendreras. Ch'i ha memia paucas spendreras giaschia dentant betg mo vi da las cundiziuns da lavur.
Dapi 8 onns è la furmaziun d'ina spendrera pli pretensiusa. Ellas ston ir a l'universitad, tge che na saja betg per mintgina, di Signer. Ed er la responsabladad è memia gronda per inquala: mintgatant è ina persula responsabla per l'entira staziun da parturir.
Uschia manca il persunal cunzunt en ils ospitals regiunals. Ultra da quai datti en il Grischun anc 40 spendreras privatas, da quellas haja i en il mument avunda.
Duas spendreras rumantschas che lavuran omaduas auter
Marlis Della Valle ha finì avant dus onns ses studi sco spendrera a Berna e lavura dapi lura en il Spital Fontana a Cuira. Il mintgadi da lavur saja fitg variant. Ella na sappia la bun'ura betg tge che spetga ella durant il di. Quai fetschia interessant sia lavur, di la dunna da 27 onns.
Jau hai adina pensà ch'i è interessant da vesair co il corp da la dunna sa mida e co igl è pussibel ch'in uman vegn sin il mund cun tut quai ch'el sto avair per viver.
Flexibilitad ed uras da lavur variantas
Da l'autra vart pretenda la professiun era bler flexibilitad. Ellas lavurian en servetschs. In di giaja quel da la bun'ura enfin il suentermezdi, mintgatant enfin la saira tard e mintgatant hajan ellas era da lavurar la notg. Far liber spontan na saja strusch pussibel, di la spendrera oriunda da Trun. Perquai saja ella leda sche sias collegas dian gia intgins mais ordavant sch'els veglian far insatge, per ch'ella possia giavischar ad uras liber quest di.
Pliras dunnas en il medem mument
Spendreras hajan ellas avunda en l'Ospital Fontana, manegia Marlis Della Valle. Natiralmain dettia situaziuns nua ch'ellas fissan ledas per ina collega dapli. I vegnia numnadamain adina puspè avant che las spendreras èn responsablas per pliras dunnas enina. Malgrà la gronda responsabladad, la flexibilitad ed era il stress ch'ella e sias collegas hajan mintgatant, fetschia ella fitg gugent sia lavur en l'ospital.
Parturir a chasa enstagl en l'ospital
In'autra spendrera, Graziella Montalta, è sa decidida da bandunar l'ospital ed avrir in'atgna chasa da parturir. Dapi passa trais onns posseda ella la chasa «Almasana» a Vaz Sut. Enfin ussa èn passa 100 uffants vegnids sin il mund là. Per ella saja impurtant da pudair accumpagnar las dunnas era gia durant la gravidanza ed era suenter ch'ellas han parturì. Las dunnas e sias famiglias pon era suenter la naschientscha anc restar intgins dis en la chasa da parturir da Graziella Montalta.
Impurtant è che las dunnas sa sentian bain. Jau ditg adina: 80% da la naschientscha capita en il chau e be 20% en il corp.
Cura che las dunnas e lur uffants bandunian la chasa duai lur olma esser sauna, perquai il num «Almasana». Sper l'accumpagnament en chasa fa la dunna da 43 onns era controllas da chasa tar las dunnas en gravidanza u quellas che han gia parturì.
Ord l'archiv