Las pendicularas grischunas han gì il mars en media passa 26% damain giasts ch'il mars da l'onn avant. L’uniun da branscha Pendicularas Grischun vesa las raschuns per il resultat flaivel en l’aura e la mancanza d’atmosfera d’enviern en la Bassa.
Davent dal cumenzament da la stagiun d'enviern enfin la fin da favrer è il dumber d'osps sa reducì per 8,8 % cumpareglià cun l'onn avant. Cumpareglià cun la media dals davos 5 onns è quai dentant anc adina in plus da 1,3%. I dettia dentant grondas differenzas tranter las pendicularas. Patì hajan cunzunt quellas en regiuns pli bassas e senza indrizs da far naiv.
Il basegn da far sport d'enviern è sa sbassà
Temperaturas autas, plievgia e marschauna n’èn betg stadas servetschaivlas per las interpresas da pendicularas. La fatschenta saja praticamain curdada ensemen mez mars. Il basegn dals giasts da far sport da naiv u excursiuns en las muntognas è sa sminuì fitg, hai gì num en la communicaziun.
