Mancanza d'energia - Pli pauc interess per autos electrics

La glieud saja il mument irritada pervi da la crisa d’electricitad. El haja gì differents clients ch'hajan gì interess per in auto 100% electric, hajan silsuenter però reponderà l’idea. Quai ha ditg Roland «Rocky» Paulin da la garascha Caflisch envers RTR. Igl haja schizunt dà annullaziuns d’empustaziuns dad autos electrics, quels clients hajan suenter cumprà in auto che va cun carburant. La glieud saja il mument fitg malsegira: Per l’ina vegnia la glieud sfurzada da spargnar forza electrica, e da l’autra vart vegnia fatg squitsch da cumprar autos electrics pervi da l’ambient. «Quai sa taglia», di Rocky Paulin, ed uschia pensia era ina gronda part da ses clients. La Bilantscha: S'interessavan pli baud 25% dals clients per in auto electric, saja l'interess sa sbassà per la mesadad, uschia Paulin.

Mintga segund auto vendì è in auto electric 

In pau auter sa preschenta la situaziun tar il Autohaus Willi a Cuira. La dumonda per autos 100% electrics saja il mument fitg auta. Mintga segund auto che vegnia vendì saja in auto electric, ha ditg Franco Piubellini, ch’è vendider ed era il vicepresident da la secziun grischuna da l’Uniun professiunala svizra da l’automobil. Tema da pretschs d’electricitad che s’augmentan, u perfin ina mancanza d’electricitad, tals arguments sajan tar el mai stads in tema.

Autos electrics èn dumandads  

La statistica da la vendita d’autos en Svizra mussa cler, ch’autos electrics èn dumandads sin la fiera. L’october passà èn 16% dals autos nov-immatriculads stads cumplettamain electrics. Sch’ins guarda sin la cifra che cumpiglia er autos ibrids (motor da benzin e motor electric), allura avevan circa 50% dals autos vendids en Svizra il mais d’october ina battaria per charrar.