En blers lieus en il Grischun mancan il mument abitaziuns pajablas per indigens. La regenza grischuna è perquai pronta d'examinar mesiras. Quai per exempel cun credits pli bunmartgads per projects che vulan stgaffir abitaziuns pajablas per il diever public. Quai è la resposta da la Regenza grischuna sin ina incumbensa da la fracziun da la PS.
Las vischnancas sajan dumandadas
En il Grischun saja – pervia da l'iniziativa cunter las abitaziuns secundaras – in pau difficil da valitar la situaziun, di la regenza. Vinavant di ella che la gronda dumonda d'abitaziuns actuala pledia per il fatg ch'investiders privats ed instituziunals construeschian puspè dapli. Ils frains, sco ils custs da construcziun u ils tschains che s'augmentan, sajan be da natira transitorica.
Da vart da las vischnancas saja ina mobilisaziun consequenta da terren da construcziun sco er ina politica activa da terren e da spazi d'abitar l'instrument il pli effizient per realisar a curta vista dapli edifizis d'abitar.
Ultra da quai promovia el la construcziun e la sanaziun da chasas da proprietad a favur da la populaziun cun entradas bassas. In'extensiun da questa promoziun recumonda la regenza en il rom da l'incumbensa Derungs concernent l'adattaziun da la promoziun da la construcziun d'abitaziuns.
Sustegn actual n’è betg suffizient
Cun la lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna, enconuscha il chantun Grischun actualmain mo l'agid al subject. Quest agid è concepì per sustegnair persunas singulas che vivan en relaziuns finanzialas difficilas. Oz è dentant la vasta populaziun dal chantun Grischun pertutgada dal problem. Las sustegnidras ed ils sustegniders incumbenseschan la regenza da stgaffir ina basa legala per promover emprimas abitaziuns pajablas.
La finamira è l’extensiun dal circul da persunas cun dretg sin contribuziuns
Sin ina sumeglianta incumbensa or dal Cussegl grond è la regenza plinavant pronta d'adattar la lescha per abitaziuns socialas e per meglierar las cundiziuns d'abitar en las regiuns muntagnardas. En il center stat d'augmentar las contribuziuns da sustegn per projects d'abitaziuns en talas regiuns.
La regenza è pronta da suttametter al Cussegl grond ina revisiun da la lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna sco er da l'Ordinaziun executiva dal Cussegl grond. Lezza ha la finamira d'augmentar las limitas da las entradas e da la facultad sco er ils meds finanzials. Pia: Extender il circul da las persunas cun dretg da survegnir contribuziuns.
