Da persunas malsaunas audan ins il mument dapertut e che quai n'è betg mo in sentiment subjectiv mussan las cifras da l'Uffizi federal da sanadad BAG. L'emna dals 20 enfin ils 26 da schaner hai en il Grischun ed il Tessin dà 667 consultaziuns da medi pervia malsognas sco la grippa e quai sin 100'000 persunas. Quai conferma era il manader da l'Uffizi da sanadad dal Grischun Rudolf Leuthold ed agiunta che la cifra da cas da grippa annunziads e testads en il labor saja bler pli pitschna:
I vegn testà pli pauc perquai ch'igl è normalmain betg d'impurtanza tge virus che ha chaschunà la malsogna. Per il pazient u la pazienta n'emporti betg sch'igl è ussa influenza, in da fraid u covid.
Il decurs da la malsogna saja sumegliant e per tut valia: restar a chasa, sa revegnir, baiver té e n'era betg ir a lavurar. Uschia prolungheschian ins be il temp da malsogna ed infecteschia ils auters, di Rudolf Leuthold.
La tuss è quest onn spezialmain stinada
Era sch'el na possia betg confermar quella tesa scientificamain haja el percepì quest onn che la tuss saja pli stinada e cuzzia pli ditg. Quai haja da far cun il tip dal virus:
Sch'i dat ina varianta da grippa ch'è gia daditg be pli circulada en la societad ha quella era pli pauca immunitad uschia ch'ils sintoms èn lura per part pli ferms. Quai sa mida dentant dad onn tar onn.
Era quest onn èn tendenzialmain uffants cun pauca u nagina immunitad pertutgads. Medemamain era glieud veglia u persunas spezialmain periclitadas. Malgrà ch'era il manader da l'Uffizi da sanadad dal Grischun na po era betg prevesair il futur: Las cifras mussian che l'unda da grippa haja gia u vegnia bainprest a cuntanscher ses zenit. Uschia ch’il ristg da vegnir malsauns sa sminuescha lura era.