Avant in onn ha il suveran da Domat acceptà in'iniziativa ch'ha pretendì ina colliaziun tranter duas vias a l'ur dal vitg (Via Musel e Via Sid). La suprastanza ed il parlament communal eran quella giada cunter l'iniziativa, ils custs sajan memia auts en relaziun cun il dumber da persunas che profitassan da la nova via.
Parlament era cunter credit
Suenter il Gea da la populaziun ha la suprastanza elavurà in project concret en il rom da 2,4 milliuns francs. Mardi saira ha il parlament communal refusà era quest credit cun 13 cunter 1 vusch. L'ultim pled ha ussa dentant puspè la populaziun, quella decida ils 21 da schaner 2024 davart il credit.
Cumbatter vinavant
Sco Giusep Blumenthal dal comité d’iniziativa ha ditg ad RTR na sajan els anc betg s’inscuntrads suenter la decisiun dal parlament. Ina chaussa saja dentant clera: el craja anc adina vi da la necessitad da quella via ed els hajan l’obligaziun da s’engaschar vinavant. E quai vegnian els er a far.
La vischnanca da Domat n’ha betg vulì prender posiziun. Uss vegnia in comité cunter l’iniziativa a prender posiziun en chaussa e betg pli la vischnanca, ha declerà il president communal Erich Kohler.
Gea per sanaziun da chasa da scola Tircal
Approvà ha il parlament communal dentant tranter auter il credit d'object da passa 3,7 milliuns francs per l'emprima etappa da sanar la chasa da scola Tircal e d'extender quella cun ina scolina. Era quest project è vegnì deliberà per mauns da la votaziun a l'urna il schaner 2024.
