Senza las mesiras rigurusas vegnia il sistem da sanadad, cunzunt ils ospitals grischuns a ses cunfins. Quai ha il president da la regenza grischuna Christian Rathgeb accentuà pliras giadas a la conferenza da medias. «Igl è impurtant d'avair respect, igl è ina situaziun seriusa. Igl è però er impurtant da vesair che nus avain pussaivladads da reagir.»
Sper garantir vinavant il provediment da sanadad giaja er per evitar ch'ins vegnia en ina situaziun sco en l'Italia. Vul dir: impedir uschè bain sco pussaivel ch'il virus sa darasia nuncontrolladamain.
La regenza è conscienta da las consequenzas
Cun serrar las scolas vulain nus evitar contacts socials, declera il minister d'educaziun Jon Domenic Parolini. El chapeschia che quai saja ina sfida per ils geniturs sch'ils uffants sajan almain enfin ils 4 d'avrigl a chasa:
Il minister d'economia Marcus Caduff fa gronds quitads: I giaja per milliuns en la branscha turistica, accentuescha el:
Quitads fan cunzunt las gruppas da risico
Las mesiras ch'il chantun Grischun ha decidì èn per anc pli severas che quellas da la Confederaziun. Il minister da sanadad, Peter Peyer è conscient da quai. Las mesiras èn però necessarias perquai ch'il Grischun saja pli ferm pertutgà che auters chantuns ed er pli datiers da l'Italia. Perquai cusseglia la regenza da resguardar sper las mesiras ordinadas, tut las reglas d’igiena e da tegnair distanza.
A persunas che s’audan en la gruppa da risico vegn cusseglia da:
- betg tgirar uffants e giuvenils,
- betg sa participar a occurrenzas publicas u privatas
- betg nizzegiar il traffic public
Marcantamain dapli infecziuns
La media chantunala Marina Jamnicki ha explitgà la situaziun actuala:
- 43 cas confermads, il pli blers en l'Engiadin'Auta
- Ins na possia betg pli reconstruir las vias d'infecziun
- Sin la fin d'emna quinta la media chantunala Marina Jamnicki anc ina giada cun marcantamain dapli infecziuns.
- En l'Engiadina e las Valladas dal sid vegnan tut las operaziuns betg necessarias spustadas. Pertutgadas èn il Centro Sanitario Valposchiavo, il Center da Sandà Engiadina Bassa, ospital da l'Engiadin'Auta a Samedan e la clinica Gut a San Murezzan.
