Lain empè d'atschal - Rempars pli favuraivels ed ecologics

La Scola auta spezialisada dal Grischun vul pussibilitar a las autoritads ch’èn responsablas per la segirtad, da trair a niz dapli il lain sco material per rempars. Quai funcziuna dentant be, sch’ins sa, tge forzas ch’el po absorbar. Ina sfida, pertge lain è in material natiral e sa cumporta different, tut tenor sort, structura interna u era tenor quant ferm ch’il lain è smarschì suenter onns en la natira.

L’Uffizi da guaud e privels da la natira dal Grischun è fitg interessà da survegnir questas datas per ch’el possia en l'avegnir calcular las dretgas dimensiuns per novs rempars. Quai è numnadamain la premissa per pudair garantir la segirezza ch'ha adina emprima prioritad. Uschia pudessan las autoritads profitar en l'avegnir da construcziuns segiras cun material indigen, ecologic e favuraivel.