La stad è arrivada - Da lais pitschens e gronds, chauds e fraids

Il Lag da Claus è in pitschen lai artifizial per far bogn a Sedrun. El tutga tar la vischnanca grischuna da Tujetsch e sa chatta en la vischinanza da l'aclaun da Surrein sin ina autezza da 1'343 meters sur mar. Il lai da far bogn ha ina surfatscha da 3'200 meters quadrats e be paucs meters dal nord al lai passa il Rain Anteriur giu la Surselva. Il lai artifizial è vegnì construì il 2012 sin ina deponia dal tunnel da basa dal Gottard.

Sin ina gronda terrassa sper il lai datti snacks e bavrondas al kiosc. Arthur Caduff che lavura sin terrassa è gia las nov la damaun al lieu. El sto preparar la terrassa per il di.

Lej Marsch

Il pitschen lai da palì sa chatta sin circa 1’812 meters sur mar en in guaud sper San Murezzan. Il lai n’è betg surveglià e l’entrada è gratuita. A la riva datti duschas, tualettas ed era pliras fuainas cun laina d’arder. Per star giu in zic e forsa far in cupid datti in prà per star a sulegl.

Lai Barnagn

Al Lai Barnagn gira bler. Nudar, dar balla-volley, u tuttina fittar in stand up paddle? Qua para tut d’esser pussaivel. Il lai è in dals pli chauds en las alps. El sa chatta sin 1’200 meters sur mar en il Surses. I na dat betg be activitads per en u sin l’aua, mabain era in percurs da mountainbike ed in parc da skateboard. En l’ustaria a la riva pon ins ir per in refrestg u era mangiar insatge pitschen.

In sigl en l'aua dal Lag Grond – ina visita a Laax

Igl è in di da chalira. Il bogn dal Lag Grond a Laax s'emplenescha cun glieud che vul sa sfradentar. Uffants, geniturs, tattas e tats – tuts èn da la partida. Il prà dal bogn dal Lag Grond a Laax è plain parasols, sientamauns da bogn, bikinis che sientan en il sulegl u ina u l'autra sutga da giaschair.

Ils uffants giogan en l'aua frestga da 23°C. Intgins han cun els lur bartga da gumma, auters s'allegran sin in sigl en l'aua. In mat raquinta ch'el haja schizunt piglià in pesch. Deplorablamain han ils geniturs ditg ch'el stoppia puspè dar liber il pesch.

Cunquai ch'igl ha pluvì las davosas emnas, n'è ina part dal prà betg vegnì sitg. Sco consequenza è sa furmà sin questa part dal prà ina palì. In visitader tudestg che vegn gia dapi 40 onns en vacanzas a Laax n'ha betg gì plaschair da quai. Sin la dumonda sch'il lai da Laax plascha ad el, ha el respundì: «Na!»