La KOHMA a Cuira venda guaffens e products tecnics ed ella porscha era in servetschs da pinar u remplazzar uders. Pervi dal coronavirus è la butia serrada, vendì vegn per telefon u online. Il servetsch d’uders è restrenschì. La vendita saja pli pitschna, di Corsin Demarmels, manader da fatschenta.
La glieud è fitg malsegira. Ins na sa betg co i va vinavant, persunalmain u era en fatschenta. Perquai ha la glieud retegnientschas da far cumpras.
7 dals 8 emploiads fan lavur curta. Annunziar quella na saja betg stà grev. Ma malgrà lavur curta ha Corsin Demarmels era stuì dumandar la Confederaziun per in credit. Per l’ina pervi da guaffens e maschinas en reserva, en cas ch’ils cunfins vegnissan serrads per tals products, per l’autra perquai ch’els hajan survegnì ina gronda lavur che pretendia investiziuns. Entaifer in’ura ha Demarmels gì il credit.
Ins n’è betg disà da survegnir in credit uschè simpel. Quai credit è in levgiament, grazia da quel èn las proximas emnas pli simplas per nus.
Il sustegn da la Confederaziun e dal chantun saja fitg bun en quest temp da crisa. L’agid saja nunbirocratic e svelt.