Glindesdi è stada l’emprima prova dal nov chor cun musica ucranaisa. 11 dunnas èn sa rimnadas a Cuira per chantar ensemen, barattar la cultura e far novas amicizias. Las bleras da las dunnas èn Ucranaisas, circa la mesadad è en Svizra perquai ch’ellas èn fugidas da la guerra e tschella mesadad abitescha gia pli ditg en Svizra. Er trais Svizras èn stadas da la partida.
-
Bild 1 von 3Legenda: Chantar en cun l'inizianta, Zoryana Mazko. RTR, Ronja Muoth -
Bild 2 von 3Legenda: L'emprim chantar en e schluccar il corp. RTR, Ronja Muoth
-
Bild 3 von 3Legenda: Las dunnas emprendan trais chanzuns tradiziunalas da l'Ucraina cun la dirigenta Olena Dvoryska. RTR, Ronja Muoth
Chantar bain ha segunda prioritad
Bleras da las dunnas n’eran en l’Ucraina betg en in chor e chantavan be per sa sezzas u cun ils uffants. Uschia accentuescha la dirigenta, Olena Dvoryska, ch’i saja uss simplamain impurtant che gist las persunas ch’èn fugidas hajan er qua la pussaivladad da s’exprimer en l’atgna lingua cun chanzuns da chasa.
Nus avain quitads. E chantar fa bain a noss cor, a nossa olma.
Gist uschè impurtant è er il contact cun las Svizras u persunas d’autras naziunalitads ch’abiteschan en Svizra, en il Grischun. Da quests barats èn fitg impurtants per las dunnas da l’Ucraina, uschia pon ellas far novas amicizias, tschantschar ed emprender meglier tudestg e vegnan uschia era integradas meglier en il mintgadi en noss chantun. Uschia è era mintgina e mintgin bainvegnids da prender part.
Bellas scuntradas
Betg mo per las Ucranaisas saja stà bel d’emprender d’enconuscher Svizras u Ucranaisas ch’abiteschan gia en il Grischun, mabain er per las Svizras sajan quai bellas scuntradas, din las participantas.
Jau speresch che quai è ina pussaivladad unica – tuttina quant gugent ch'jau chant.
E tuttina speran ellas ch’il project cun quest chor è ina chaussa unica e che la guerra fineschia uschè spert sco pussibel, per che las dunnas possian puspè ir a chasa tar lur umens, figls e famiglia.