Sur Flem ha brischà mesemna saira l'ustaria da Foppa che sa chatta en il territori da skis da Flem/Laax. Sco quai che la Polizia chantunala ha communitgà, haja ella survegnì l'alarm las 20:30. Fin ch'ils pumpiers sajan stads al lieu, hajan lavurers d'in plazzal vischin empruvà da stizzar il fieu. Malgrà quests sforzs è il fieu sa derasà sin tut il bajetg ed ha destruì cumplettamain quel. Ils bajetgs vischins sco era las plantas en il conturn da l'ustaria han ils pumpiers pudì salvar.
Naginas unfrendas però donns immens
Ils pumpiers hajan stizzà fieu fin suenter mesanotg, scriva la polizia plinavant. Fin oz gievgia marvegl saja vegnì fatg guardia. Persunas n'èn naginas vegnidas blessadas. Ils donns ch'i ha dà entras l'incendi vegnian entant a muntar a passa in milliun francs. La Polizia chantunala ha lantschà examinaziuns per eruir pertge l'ustaria «Berghaus Foppa» ch'era en renovaziun ha cumenzà a brischar.
L'ustaria «Berghaus Foppa» sa chatta gist sper la staziun da mez da la nova pendiculara FlemXpress.
