Tar l'incendi amez Domat èn duas stallas arsas cumplettamain. Era duas chasas vischinantas sajan vegnidas donnegiadas, quai scriva la Polizia chantunala en ina communicaziun a las medias. Ils donns vi dad ina da las chasas d'abitar sajan gronds. Persunas blessadas n'haja dà naginas. Trais persunas èn puspè vegnidas relaschadas d'ina examinaziun sin ina tissientada da fim. Ellas sajan senza blessuras. En tut sajan 120 pumpieras e pumpiers stads en acziun, quai èn stads quels da Domat, Cuira e l'Ems Chemie.
L'annunzia ch'igl ardia en il center da Domat saja vegnida curt avant las 7:00. Suenter circa trais uras saja il fieu stà sut controlla. Sper ils pumpiers èn collavuraturas e collavuraturs da l'Uffizi da natira ed ambient, da la vischnanca da Domat e dal salvament da Cuira stads en acziun. Plinavant è ina crana d'ina interpresa privata vegnida nizzegiada per lavurs da stizzar.
Impediments da traffic
En consequenza da l'incendi è la H13, la via principala tras la vischnanca, serrada en omaduas direcziuns. Il traffic è vegnì svià enfin las 19:00 il glindesdi saira.
