Il parlament communal da Domat dumbra 15 commembras e commembers da quatter differentas partidas. Cun tschintg sezs resta l'Allianza dal Center vinavant la partida cun las pli bleras persunas en la legislativa communala. Er il president communal da Domat Erich Kohler è commember da l'Allianza dal Center. El è vegnì reelegì il zercladur passà.
Tuttina resta era la repartiziun da sezs tar la PS, la PLD e la PPS. Vinavant quatter sezs han ils socialdemocrats, la partida populara ed ils liberaldemocrats han mintgamai trais represchentantas e represchentants en il parlament communal.
Da las en tut 15 persunas en il parlament èn 11 persunas vegnidas confermadas en lur uffizi e quatter parlamentaris èn novs. Quai èn da l'Allianza dal Center Andrea Brunner ed Andri Seglias, dals liberaldemocrats Simon Diener e da la PPS Diego Krättli. Il sulet parlamentari en uffizi che n'è betg vegnì reelegì è Edi Wäfler da la Partida liberaldemocratica. Lez ha da far plaz a ses collega da partida Simon Diener che figurava davant el sin la glista da la PLD.
Participaziun constanta
Cunquai che Domat dovra il sistem da proporz per eleger, èn sulettamain persunas ch'èn part d'ina da las partidas grondas idas en cursa per las elecziuns. Persunas senza partida n'avessan strusch ina schanza da far il sigl en il parlament communal.
La pli gronda delegaziun per las elecziun ha gì la Partida populara svizra. Betg main che 12 persunas han candidà sin la glista da la PPS. Las ulteriuras partidas èn idas cun pli pauca glieud en cursa, dentant cun pli bleras persunas ch'èn duas giadas sin la glista. La PS e l'AdC han tramess mintgamai otg persunas en il cumbat, ils liberaldemocrats tschintg persunas.
