En ses temp liber è Ignacio Pérez Prat savens per las vias grischunas cun ses oldtimer, in IKA-Renault Torino dal 1971. Quest auto ha el importà da l'Argentina, in project ch'ha duvrà blera pazienza e temp. L'auto giascha a cor a l'um ch'è creschì si a Buenos Aires ed ha fatg sias emprimas experientschas dad ir cun auto en in sumegliant model, quel da ses tat. Insumma saja quest vehichel collià cun bleras regurdientschas ed anc dapli emoziuns – era perquai ch'Ignacio Pérez Prat fa sez ina pluna lavurs vi da l'auto.
Argentina – Germania – Grischun
Ignacio Pérez Prat ha bandunà l'Argentina cun 19 onns, savend ch'el laschia enavos famiglia e bleras amicizias. Dentant haja el vis che la situaziun economica e politica na sa sviluppia betg bain – ed uschia è el sa decidì per questa via. En Germania ha el fatg il studi dad inschigner en economia, ed en il Grischun è el la finala vegnì pervia da la lavur.
Entras bleras turas e visitas dad occurrenzas culturalas ha el er emprendì d'enconuscher il rumantsch sursilvan. Lura, durant la pandemia da corona haja el ponderà co utilisar il temp che steva tuttenina a disposiziun. El è sa decidì d'emprender rumantsch e quai online. Ina chaussa ch'el ha fatg fitg consequent e cun la clera finamira da pudair discurrer rumantsch. Quai è gartegià.
Cura che jau discurriva sulettamain tudestg, na ma sentiva jau betg uschè da chasa sco uss.
Entras discurrer e chapir il rumantsch sajan bleras novas portas s'avertas. Enconuschientschas cun persunas e schizunt ina nova plazza da lavur hai dà ordlonder. Il december cumenza Ignacio Pérez Prat sco responsabel per la transfurmaziun digitala dal rumantscha, e quai tar la Lia Rumantscha. «El daventa ina persuna publica» di Andreas Gabriel, il vicesecretari general da la Lia Rumantscha. I saja impurtant da s'occupar da la transfurmaziun da la lingua per betg perder l'access a quest svilup tecnic.