Il motiv per l'augment saja ch'il «potenzial da resursas» tar las pli fermas vischnancas è creschì fermamain. Quai scriva il chantun Grischun en ina communicaziun. Concret vul quai dir che las vischnancas han prendì en dapli raps da taglia. Las taglias da persunas privatas fan or cun 627,4 milliuns ubain 69% ina buna part dal potenzial da resursas. Vitiers vegnan raps da taglia da firmas (100,5 milliuns francs), tschains d'aua (49,2 milliuns), sco er 1,5 promil da las valurs fiscalas da las immobiglias (131,5 milliuns).
Il potenzial da resursas per persuna en Grischun è actualmain tar 4'258 francs (l'onn passà anc tar 4'109 francs). Questa valur media correspunda a 100 puncts sin l'index da resursas. Vischnancas cun dapli che 100 puncts valan sco vischnancas fermas, che ston contribuir. Sco pli ferma vischnanca vala Ferrera cun in index da 372, sco pli flaivla vischnanca vala Tschappina cun in index da 45.
Gulivaziun da las grevezzas geografic-topograficas e da scola
En tut 48 vischnancas profiteschan da la gulivaziun da las grevezzas geografic-topograficas e da scola. Quai èn tut vischnancas cun sfidas tar la structura d'abitants. Tut las vischnancas survegnan en tut 27 milliuns francs – 2 dapli che l'onn avant. Surtut vischnancas en Surselva ed en la regiun Tavau/Partenz profiteschan da quels raps.
17 vischnancas han da bun agid pervi da l'agid social
Vischnancas ch'èn pertutgadas surproporziunalmain da l'agid social, pon s'annunziar per survegnir ina gulivaziun. L'onn proxim survegnan 17 vischnancas contribuziuns da totalmain 625'000 francs. L'onn avant eran quai anc 12 vischnancas cun total 351'000 francs. Tranter las vischnancas che survegnan il 2025 ina contrubuziun sa chattan Cuira, Landquart, Schluein ubain Felsberg.
