Dapi plirs dis èn helicopters en acziun e sgolan singuls bostgs or dals guauds da l’Engiadina Bassa. Il motiv è il bau-scorsa, pli exact il tipograf, ina spezia da bau-scorsa che sa derasa gugent sut la scorsa dals pigns.
Ch'igl ha dà quasi in’explosiun da tipografs quest onn ha in connex cun l’aura. D’ina vart ha la sitgira indeblì las plantas e las temperaturas chaudas han sustegnì il svilup dal bau.
La mesira la pli urgenta è d'allontanar uschè spert co pussaivel ils bostgs cun il tipograf sut la scorsa per che las larvas na pon betg sa sviluppar a novs baus e sa derasar en ils bostgs vischins.
Perquai ch'i fa prescha vegn quai fatg cun il helicopter. In auter motiv per il helicopter è che las plantas infestadas èn sparpagliadas sin tut il territori.
Tenor il selvicultur da Scuol, Antonin Hugentobler, han ins actualmain sut controlla la situaziun. El spera uss sin in enviern fraid che decimescha il bau e sin ina primavaira bletscha che rinforza las plantas.
Or da l'archiv:
