Igl è ina situaziun crudaivla: Ansiels da chavriels èn sin in prà e vegnan blessads u schizunt mazzads entras maschinas da segar. Ils purs na pon betg adina vesair ils chavrielins en il pastg aut u en chaglias. Uschia emprovan ins uss cun l'agid da dronas, equipadas cun cameras termicas, da chattar chavrielins sin prads, avant ch'i vegn segà.
Dronas dal chantun e pilots laics
Tar il pausadi Viamala a Tusaun èn laics da l'entir chantun (per gronda part chatschaders) vegnids scolads, co ch'i saja da sgular dronas. Il chantun metta numnadamain a disposiziun las dronas, a manar ils projects vegnan dentant las secziuns da chatscha regiunalas en collavuraziun cun ils guardiaselvaschina.
Las dronas dal curs a Tusaun eran dentant anc betg equipadas cun las cameras termicas. Quellas dovri per alura chattar chavrielins. En emprima lingia gievi uss tar quest curs simplamain da trenar il sgular las dronas.
-
Bild 1 von 5Legenda: Schebain ch'i suflava fitg èsi stà pussaivel da sgular, cunquai ch'il vent era betg pli ferms che 40 kilometers per ura. RTR, Pietro Jacomet -
Bild 2 von 5Legenda: Varga 30 voluntaris han chattà la via a Tusaun. RTR, Pietro Jacomet
-
Bild 3 von 5Legenda: Teoria avant pratica: Sco emprim hai gì num d'emprender las infurmaziuns da basa davart sgular cun dronas. RTR, Pietro Jacomet
-
Bild 4 von 5Legenda: I na saja betg grev da far sgular la drona (sanester en il maletg), sco ils participants da questa gruppa han ditg. RTR, Pietro Jacomet
-
Bild 5 von 5Legenda: Ils chatschadurs da la secziun Tasna han gia l'onn passà tschertgà chavrielins cun dronas. Al curs han els mussà sco emprim in sgol da test. RTR, Pietro Jacomet
Metoda è sa cumprovada
La secziun da chatscha Tasna en Engiadina Bassa aveva lantschà il project da tschertgar chavrielins cun agid da dronas l'onn passà. Quest onn vegn quella metoda er introducida en las regiuns Signuradi, Partenz, Tumleastga, Val Schons e Surselva. Per salvar ansiels da chavriels ha il chantun cumprà 20 dronas.
Quella investiziun fa en mintga cas senn – ins fa ina lavur cuminaivla en favur dals chavrielins.
Il salvament cun dronas vegn a cumplettar las metodas existentas per proteger ils ansiels da chavriels, sco per exempel spaventar els giu da prads cun tschorventar.
RR actualitad 12:00