Ch'il chantun Grischun è daventà finanzialmain pli ferm mussan las cifras che l’administraziun da finanzas federala ha preschentà. Quai munta dentant ch'il Grischun survegn en l'avegnir damain daners or da la gulivaziun da finanzas federala.
Il minister da finanzas chantunal, Martin Bühler, di ch'il chantun ha profità d'in effect dubel: Per l'ina haja i dà dapli taglia, per l'autra han ins survegnì contribuziuns da la gulivaziun da finanzas sin basa da cifras veglias.
A partir dal 2026 vegn la gulivaziun da finanzas calculà sin basa da cifras pli actualas, e pia vegn il chantun Grischun taxà pli ferm. Quai munta ch'el survegn damain contribuziuns da la gulivaziun da finanzas.
En tut 305 milliuns francs dapli l'auter onn
Ils pajaments en la gulivaziun da finanzas als chantuns vegn l'auter onn probabel ad esser 305 milliuns francs dapli che quest onn. En tut muntan ils pajaments l'auter onn a 5,9 milliardas francs, sco l'administraziun federala da finanzas ha communitgà.
Il motiv per ils pajaments pli auts als chantuns cun pli paucas resursas sajan surtut las entradas da taglia che creschan e l'inegualitad che prendia tiers. Las calculaziuns da l'administraziun da finanzas vegnan ussa suttamessas als chantuns per prender posiziun.