En il Grischun eran puspé in zic damain persunas senza lavur il matg. Cumpareglià cun il mais avant è il dumber sa reducì per 187 persunas sin anc 1'127. Quai mussan las novas cifras da l'Uffizi per industria e mastergn. La quota da dischoccupaziun è uschia ida enavos da 1,2% sin 1%.
Las pli bleras persunas èn stadas senza lavur en la restauraziun cun 485 persunas, suandà dal commerzi en detagl cun 78 persunas. Ina persuna pli pauc dischoccupada è stada en il sectur da sanadad cun 77 persunas dischoccupadas.
Il matg han ins era dumbrà 39 persunas dischoccupadas da lunga durada. Cumpareglià cun l'avrigl n'hai là sa midà nagut.
Er en l'entira Svizra hai puspè damain persunas senza lavur
En l'entira Svizra è la quota medemamain sa reducida levet. Quai sut la marca da 2% sin anc 1,9%. La fin da matg eran tut en tut 88'076 persunas senza lavur. L'avrigl eran quai anc passa 90'000 persunas.
