En il Grischun èn 1’314 persunas stadas senza lavur l’avrigl. Quai èn bunamain 300 dapli ch’anc il mars. La quota da dischoccupaziun munta ad 1,2%. Quai ha communitgà l'Uffizi per industria, mastergn e lavur dal Grischun. L’augment saja en emprima lingia d’attribuir a la fin da la stagiun d’enviern.
En l’entira Svizra è il dumber da dischoccupads percunter sa reducì levet da 92'755 sin 90’534. Quai correspunda ad ina quota da dischoccupaziun da 2,0%. L’avrigl han 13 manaschis survegnì indemnisaziuns per lavur reducida en il Grischun. Cumpareglià cun il mais avant (117 manaschis) è quest dumber sa reducì marcantamain. Pervi d'in midament da sistem ed il fatg che manaschis han fin trais mais temp per dumandar per indemnisaziuns na saja il dumber dentant betg represchentativ, uschia l'Uffizi per industria, mastergn e lavur dal Grischun.
