-
Bild 1 von 3Legenda: Ils lufs che en persul sin via stgarpan per il solit pli bleras nursas tge quels dil triep dal Calanda. Keystone -
Bild 2 von 3Legenda: Thomas Roffler, manader da l'Uniun purila dil chantun Grischun Vischnanca da Grüsch
-
Bild 3 von 3Legenda: Adrian Arquint, inspectur da chatscha dal chantun Grischun. RTR, Angela Hendry
I saja grev da dir exactamain quants lufs ch'i dettia en il chantun Grischun. Adrian Arquint, manader da l'Uffizi da chatscha e pestga dal Grischun va or da quai ch'i dettia mumentan tranter 15 e 20 lufs en il chantun.
Il center dals lufs è anc adina il Calanda cun il triep da lufs che viva là dapi il 2012. Ma igl ha adina puspè giuvens lufs che bandunan il triep – per ordinari fan quels pli gronds problems, ergo stgarpan nursas. Cunquai che la populaziun da l'animal stgarpant en il chantun crescha vinavant, datti tenor Adrian Arquint onn per onn pli blers incaps nungiavischads.
Stgarpadas en las regiuns Surselva e Valragn
Las davosas emnas han ins udì da trais differentas stgarpadas pli grondas en las medias. Datiers dal Pass dal Lucmagn ha in luf stgarpà mez fanadur 18 nursas ed avant curt èn durant ina notg otg nursas vegnidas stgarpadas sin l'Alp Gren a Sursaissa. Era a Spleia sin l'Alp Stutz èn entaifer in mais 30 nursas vegnidas stgarpadas.
Daco na datti nagins problems enturn il Calanda?
Atgnamain èsi curius ch'i n'ha fin uss betg dà dapli stgarpadas enturn il Calanda, nua ch'i ha ils pli blers lufs. Il triep da lufs para betg dad esser talmain fixà sin nursas:
Cunquai ch'igl ha blera selvaschina enturn il Calanda, sa nutreschan ils lufs da quels animals.
In auter motiv saja dentant era:
Il triep dal Calanda è pli organisà e stgarpa pli effizient che lufs singuls.
...uschia pon ins almain per gronda part declerar, daco ch'ins auda da cas da stgarps plitost en regiuns lunsch davent dal Calanda.
RR actualitad 17:00