In motiv saja segir, che la flur-portg possia sa derasar extrem ferm, ina gia ch' ella saja sflurida, declera il fisiolog da plantas e rectur da l' Academia Engiadina, Ueli Hartwig. «Ils sems dallas flurs-portg pon s' etabilir dapertut là, nua ch' igl n'ha nagut sin ils funs. Flurs-portg èn perquai indicaturs per largias en ils prads.»
![flur-portg ch' è sflurida e perda sems](https://www.rtr.ch/static/cms/images/960w/e6c9ca.jpg)
Surviva bain fasas sitgas
Las largias possian sa furmar per differents motivs: Sch'igl è fitg sitg pireschan tschertas plantas. Er durant cultivar il prà, pon maschinas chaschunar donns. «Probabel hai da far cun la setgira da l'onn passà che la
flur-portg è stada derasada anc pli fitg che uschiglio quest onn.» La flur-portg cun sias ragischs a pal survivia per regla numnadamain relativ bain fasas sitgas.
Buna planta da pavel
Sche las flurs-portg sajan be uschè spessas durant ina stagiun, saja quai nagin problem, uschia Hartwig. «Per la raccolta da fain da quest onn è quai dentant schlet.» Cun ina gronda part da flurs-portg, dettia il fain numnadamain dapart. Sch'il pur sileschia dentant na fetschia quai nagut. Sco pavel per ils animals è la flur-portg tenor Ueli Hartwig schizunt buna.