Viver persistent - Co nutrir 10 milliardas persunas?

Algas sco materia primara per sa nutrir, veganissem ed in sguard en il futur dal nutriment global, quai èn stads ils temas dal referat da l'ecolog agrar Urs Niggli.

Mangiar pli pauca charn

Tut en tut duess ins urgentamain mangiar pli pauca charn, surtut charn-portg e giaglinom. Quels dus sajan numnadamain concurrents da nutriment per l'uman. Senz'auter pon ins er vinavant consumar charn vatga, vadè ed er latg. Ma ins na dastga betg dar graun als grond remagliaders che pon mangiar erva.

L'onn passà ha tenor l'Uffizi federal per agricultura mintga Svizzer e mintga Svizra en media mangià 10,5 kilos charn. Recumandà tenor la societad tudestga per scienza da nutriment fissan 1,5 kg charn per persuna ed onn. Ord raschuns da sanadad fiss ina reducziun dal consum da charn per 70-80% necessaria. Urs Niggli di dentant, che nus fissan gia sin buna via cun reducir il consum da charn per la mesadad. Perquai saja el cuntent per mintgin che desistia da products animalics u da charn. Quai saja dentant be ina part da la schliaziun.

Tge duain nus mangiar?

Resguardar plirs aspects

Da nutrir la populaziun mundiala senza products animalics na saja tenor l'ecolog agrar betg pussaivel. Sin l'entir mund dettia 50-70% cuntrada d'erva, ch'ins na possia betg arar pervia dals pli differents motivs. Sin quellas cuntradas na saja betg pussaivel da cultivar graun. En il Grischun saja quella cumpart anc bler pli auta. Sin l'entir mund dettia fitg blers pievels da pasturs, che hajan adina vivì da la biestga.

Il pensum il pli impurtant da l'ecologia agrara saja da bajegiar punts tranter producents e consuments. Sche la populaziun na sa nutreschia betg persistent na saja er in'agricultura persistenta betg pussaivla.

Per pudair nutrir la populaziun mundiala na dettia betg LA schliaziun. Per Urs Niggli dentant è cler: Nutriment ed agricultura s'audan ensemen, i na saja betg pussaivel da sviluppar be ina part independent da tschella. L'ecolog agrar è persvas ch'i saja pussaivel da nutrir 10 milliardas persunas; e quai senza destruir noss plant. Ins stoppia simplamain avair dapli fantasia e modestadad, lura vegnia quai a funcziunar.