Kurt Patzen è cun ses 68 onns ina vulp veglia en la politica communala. Cun la reelecziun cumenza el ussa il 21avel onn en uffizi. «Far gugent, alura na stos betg» quai saja sia tenuta. E l'avantatg dad esser tant onns gia en uffizi: « A Cuira enconusch jau ils uffizis e las persunas responsablas, e cuntrari er», quai faciliteschia savens la lavur. Il medem mument vesa Kurt Patzen er ch'i dat adina dapli regulaziuns e leschas. E quai fetschia savens pli cumplitgada la lavur en vischnanca.
Far gugent, alura na stoss betg.
Ins sa gida en vischnanca
Per Kurt Patzen è l'engaschament per la communitad essenziala. Quai saja forsa er in tratg caracteristic gualser. Ins sa gida e contribuescha insatge per la societad. Adina puspè menziunia el per exempel envers persunas pli giuvnas, ch'i dovria in engaschament per pudair restar independent e savair furmar il futur. Per il futur da la vischnanca Avras è Patzen fitg optimistic. Dals 170 abitants sajan da quai da 30 uffants, e quai fetschia plaschair.
Ina fusiun cun Farera n'è il mument nagin tema
Da chattar persunas per in post en la suprastanza saja il mument nagin problem, quai saja forsa er ina tenuta dals Gualsers di Patzen. «Sa gidar e contribuir a la cuminanza» quai saja insatge ch'el observescha en sia vischnanca. En la vischnanca vischina Farera na dettia nagins indigens pli ed uschia saja er la distanza creschida ils davos onns.