En connex cun il plan directiv, sto la vischnanca da Vaz reducir zonas da bajegiar. Tenor in sboz dal plan da zonas duess la parcella 3'011 vegnir declassada sco zona per edifizis e stabiliments publics. La parcella 1'578 cun ina surfatscha da 4'333 meters quadrats duess restar ina zona d’abitar. Là vul la vischnanca da Vaz en il futur realisar spazi d’abitar per famiglias indigenas. Ina cumissiun che sa cumpona dad otg persunas, duess ussa elavurar in concept, co ch’il terren duess vegnir surbajegià, e co ch’il dretg da construcziun duess vegnir surdà. En questa cumissiun per surbajegiar la parcella 1'578 è vegnì elegì Sascha Ginesta sco represchentant dal cussegl communal. Tranter auter fan part a la cumissiun era il president communal Maurin Malär, e Manfred Fiegl, ch’è spezialist d’immobiglias. Il parsura da la cumissiun è Thomas Parpan.
Nagin bus electric
A Lai na vegn betg a cursar in bus da sport electric ils proxims tschintg onns. Il cussegl communal da Vaz ha refusà in credit supplementar da radund 200’000 francs, ch’il cussegl communal da Vaz avess gì dad approvar per ils onns 2022 – 2027. La raschun per il Na è tranter auter stada la tema, ch’il bus da sport pudess avair problems cun la capacitad da la battaria, e quai surtut durant ils mais da l’enviern. En il messadi steva scrit, ch’in bus electric custia radund 5% dapli ch’in bus che va cun diesel. Quai saja supportabel, ed era en il senn da la citad d’energia da Vaz, che veglia spargnar CO2 cun laschar cursar in dals bus da sport cun in motor electric. Per l’entir manaschi dal bus da sport paja la vischnanca da Vaz mintg’onn 810’000 francs.
Ulteriuras fatschentas
Plinavant ha il cussegl communal saramentà il cusseglier communal Sascha Ginesta, ed approvà la revisiun parziala dal reglament d’indemnisaziuns. Per la Taskforce corona Lai per las expensas dal 2022, ha il cussegl communal approvà in credit supplementar da 23’000 francs. La fin da la sesida dal cussegl communal è vegnì ditg adia a Johann Gruber, ch'è stà 15 onns chanzlist da Vaz. La fin da mars dat el giu ses uffizi. Sia successura è Jeanne Richenberger.