Il martgà da pels a Tusaun è enconuschent lunsch sur ils cunfins dal chantun or. Quel di sa mida il center dal vitg mintgamai en ina plazza da martgà viva. Uschia n'èsi era questa giada betg auter: Malgrà l'aura variabla han bleras persunas cun mirveglias e natiralmain era chatschaduras e chatschadurs chattà la via a Tusaun.
-
Bild 1 von 4. Chatschadurs portan lur pels tar il martgadant. Bildquelle: RTR.
-
Bild 2 von 4. Musica da chatscha ha procurà per ina bella atmosfera durant la fiera. Bildquelle: RTR.
-
Bild 3 von 4. Tscherts visitaders portan las pels en furma da chapitschas u gilets. Bildquelle: RTR.
-
Bild 4 von 4. Duas Englaisas han cumprà pels da vulp. Or da quellas vulan ellas far ina cuverta. Bildquelle: RTR.
Ils chatschadurs preschentan savens lur pels d'animals or da la chatscha svizra en ina moda e maniera originala: Els pendan las pels vi da bastuns gross e portan quels sin lur spatlas al martgadant. Auters han construì chars da lain sin rodas per transportar lur pels. Il martgadant controllescha las pels e fa in'offerta als chatschadurs.
Per ina buna pel da vulp survegn il chatschader 8 francs, per ina fiergna 15.
80% da las pels che Johann Hofstetter cumpra, vegnan exportadas. En Svizra saja la dumonda pitschna. Quai decleria il pretsch bass. Pervia dals daners na stoppian ins betg vender las pels. Ritg na vegn ins betg, manegian blers chatschadurs.
I na va betg per ils raps – la passiun è propi il bel vi da tut quai.
Sin il martgà na vendan ils chatschadurs betg mo las pels, ins po era cumprar pels gia preparadas e products da pel. Ma venalas n'èn betg mo pels: Ils chatschadurs e las chatschaduras porschan era lur products regiunals, ch'èn per part fatgs a maun.
Il giubileum da 25 onns
Dapi l'onn 1998 datti il martgà da pels. Sulettamain duas giadas n'ha el betg gì lieu dapi lura – pervia da las restricziuns da pandemia. Organisada vegn la fiera da l'uniun da chatschaders Traversina. Il president Ralf Riedi è era quest onn fitg cuntent cun il dumber da visitaders e cun la grondezza creschenta da la fiera.
Quest onn è il martgà puspè creschì per in terz. Quai è simplamain bel.
Visitada vegn la fiera da grond e pitschen, da giuven e vegl. Era sche la gronda part da las visitadras e dals visitaders èn stads chatschadras e chatschaders: L'interess per la fiera da pels a Tusaun saja mintgamai era grond da vart da la populaziun, uschia Ralf Riedi.
Or da l'archiv