Per l’elecziun dal presidi da Tusaun datti dus candidats. Quai èn il president communal actual Curdin Capaul (Partida liberaldemocratica svizra), ed Ivo Rohrer. Rohrer (Partida verd-liberala) aveva gia tar l’elecziun avant trais onns candidà, ma pers l’elecziun. El aveva survegnì 368 vuschs, Capaul 448. Per la suprastanza communala candideschan 7 persunas per 6 posts. L’elecziun a l’urna è ils 24 da november.
Curdin Capaul è gia otg onns president communal
Sco quai che Curdin Capaul ha ditg, vuless el gugent cuntinuar la proxima legislatura sco president communal. El haja ina gronda rait da contacts, e sia savida da projects saja gronda. Gugent manass el vinavant projects lantschads. Tranter auter numna el la sanaziun da finanzas, la revisiun da la planisaziun locala che stoppia vegnir introducida, e la constituziun communala che stoppia vegnir revedida. Era il svilup da la staziun da Tusaun sco era da la Neudorfstrasse, sajan projects ch’el haja lantschà e veglia manar ad ina finiziun. El saja pertschert ch’el n’haja betg mo amis en vischnanca. Ma quai saja era normal, surtut cura ch’ins haja da far decisiuns nunpopularas.
Rohrer vul meglierar las finanzas senza ch'ils burgais ston patir
Ivo Rohrer è stà ils davos trais onns commember da la cumissiun da gestiun. Quai haja dà ad el ina vasta invista en ils affars da la vischnanca ha el ditg. Pertutgant las finanzas vesa el grond potenzial per l’avegnir. I saja da surponderar las expensas da la vischnanca, en il grond, sco era en il pitschen. I possia per exempel betg esser, che durant ina festa a Tusaun vegnian las uras da parcar simplamain cuvertas. Tenor el saja quai sbaglià, i saja plitost impurtant da rinforzar il traffic public. Metter en urden las finanzas senza che la populaziun stoppia patir, quai saja ina da sias finamiras, ch’el vegniss elegì sco president communal. Il bun resultat d’avant trais onns dettia speranza ad el, ch’i pudess grategiar questa giada.