Enfin l'atun han ils acziunaris temp da chattar persunas che sa mettan a disposiziun per il cussegl d'administraziun da la Turissem Savognin Beiva SA. Ils acziunaris èn la vischnanca da Surses, l'Uniun da mastergnants e commerzi Surses, Savognin Pendicularas SA e l'organisaziun turistica Anavant Surses.
Gregor Vellacher resta
La Turissem Savognin Beiva SA è vegnida fundada il mars 2018. Emprim president dal cussegl d'administraziun è stà Daniel Fischer. El è sa retratg sco previs suenter in onn, suenter las lavurs d'introducziun e preparaziun dal project.
L'avust 2019 è alura Luzi Thomann vegnì elegì sco nov parsura dal cussegl d'administraziun. Ensemen cun el demissiunescha uss era la vicepresidenta Eveline Sauper.
In dals motivs ch'il president e la vicepresidenta sa retiran è – ch'ins n'è betg adina d'accord cun la tenuta da la suprastanza da la vischnanca da Surses envers il cussegl d'administraziun da l'organisaziun da turissem.
Il represchentant da Savognin Pendicularas SA, Christoph Passecker, turna la stad en l'Austria, entras quai è era quest post vacant. Plinavant han Martin Bosshard, Roberto Guetg ed Ornella Guidon annunzià da sa retrair. Quai conferma Luzi Thomann envers la FMR.
Il sulet commember che resta è Gregor Vellacher, il represchentant da la vischnanca da Surses. El ha surpiglià quest post pir avant in onn.
A la tschertga da persunas adattadas
Sco Patrick Thurner, il president da l'Uniun da mastergnants e commerzi – e copresident dad Anavant Surses – ha ditg, vegnia ina cumissiun da recrutaziun cun persunas dals acziunaris ir a la tschertga da candidatas e candidats. Termin per l'elecziun è la radunanza generala da la Turissem Savognin Beiva SA, l'atun 2025.