Sonda passada ha l'occurrenza danovamain carmalà bleras persunas a Grava. Otmar Netzer, il president dal comité d'organisaziun da la Tundeida, ha ditg ch'il pli bler vi dal success da l'ediziun da giubileum haja contribuì l'aura magnifica. «Nus dastgain esser fitg cuntents cun la Tundeida 2023 cun passa 2500 visitaders e visitadras», di Otmar Netzer.
Er tge che pertutga il dumber da nursas saja l’occurrenza stada in success cun 332 nursas, nursas da purs da Savognin e da las vischnancas vischinantas. Otmar Netzer punctuescha ch'il public saja gia cumparì da bun'ura, ina novitad. Bleras persunas sin visita sajan anc restadas a Savognin per guardar la Tundeida e sajan partidas suenter en la Bassa. En general possia ins pia trair ina bilantscha positiva, di Netzer cun plaschair.
Ils egls da Lucia Netzer glischan cura che la cusunza raquinta da la Tundeida a Savognin. Avant 20 onna ha ella per far reclama per il agen atelier e sieva che purs han intimà ella realisà l'emprima Tundeida. «Il turissem, la vischnanca e la scola da skis han d'entschatta davent sustegnì l'idea ed han gidà» raquinta l'inizianta.
Gia L'emprima ediziun è stada cun 1000 visitaders in success. La Tundeida è sa sviluppada ad in punct fix per giasts ed indigens, uschia ch'il otgover vegn s'etupà e stà da cumpagnia.
En discurs cun RTR sa regorda la dunna da 78 onns er dal mument ch'ella ha decidì da surdar l'organisaziun. Ella saja stada enorm cuntenta che l'uniun purila Alvra ha ristga quel pass. Ella saja restada fidaivla sco expositura e haja gì ensumma negin problems da laschar ir. «Jau sun simplamain betg pli ida d'in stan da martgà a l'auter per controllar» surri Lucia Netzer e di enevant: «Cun 68 onns èsì er stà in bun temp da laschar ir» ed è cuntenta che la Tundeida è ussa puspe in pà sco avant 20 onns.
Or da l'archiv
