Quest onn ha la «Tundeida» gì lieu pli baud ch'ils ultims onns. Quai sco er la prognosa da l'aura betg uschè buna, ha procurà ch'in zic pli pauca glieud è stada a Savognin cumpareglià cun auters onns. Tuttina han bleras e blers vulì vesair co che las nursas vegnan tundidas. Sco quai vegn fatg ozendi, dentant era la moda tradiziunala da tunder, ha Martin Kolb demonstrà. El tunda adina sez sias radund 90 nursas, quai fa el pli plaun dentant saja per el fitg impurtant da far sez quai.
Dapi intgins onns ha Otmar Netzer surpiglià il presidi dal comité d'organisaziun. Sia motivaziun è simpla: El è in vaira fan da questa occurenza. Per el persunalmain saja quai la pli bella festa a Savognin, di l'um che ha sez dentant naginas nursas.
Sper l'arrivada da las radund 250 nursas en il vitg, è la «Tundeida» dentant er in lieu per degustar il chaschiel d'alp e cumprar ina pluna products sin il martgà.