Il chantun Grischun vegn a tschentar in’ulteriura dumonda da pudair regular il triep da lufs dal Beverin a l’Uffizi federal d’ambient a Berna. Quai ha ditg Adrian Arquint, il manader da l’Uffizi da chatscha e pestga dal Grischun, envers las gasettas da Somedia. I sa tracta gia da la quarta dumonda dastgar sajettar luffins dal triep. Inoltrar la dumonda possia il chantun dentant pir cura ch’el possia cumprovar ch’il triep tiria er si quest onn luffins. Quai vegnia ad esser il cas il fanadur u avust, uschia Arquint vinavant. Lura bandunan ils luffins cun radund 3 mais numnadamain l'emprima giada lur tauna.
Effect d'emprender pitschen
Sch'ins tschentia pir uschè tard la dumonda per sajettar saja l'effect d'emprender tar il luf dentant fitg pitschen, perquai che la stad va gia vers la fin. Perquai s'engascha il chantun per adattar la lescha uschia ch'i daventa pussaivel da sajettar lufs er preventivamain.
Recurs pendent
Ina segunda dumonda per sajettar il leader dal triep dal Beverin, il mastgel M92, na vul il chantun actualmain betg. Là è in recurs anc pendent davant il Tribunal federal. Quel ha il chantun inoltrà perquai che la dumonda da sajettar quest luf era vegnida respundida negativ l'onn passà. Quest resultat final saja segir anc da spetgar giu, ma ins quinta ferm ch'il bab dal triep dal Beverin vegnia er vinavant a chaschunar problems, ha ditg Arquint.
Quest onn era il triep betg be dà en egl pervi dals stgarps da nursas mabain er perquai ch'in luf singul dal triep saja currì suenter a biestga, e quai er durant il di.
