-
Bild 1 von 13. Las medias, sponsurs e fauturs han pudì guardar co ch'i vegn bajegià in mir sitg. Bildquelle: RTR, Federico Belotti.
-
Bild 2 von 13. Per far in mir sitg dovra quai fitg blera crappa. Bildquelle: RTR, Federico Belotti.
-
Bild 3 von 13. Per ch'in mir sitg tegna, ston ils lavurants far lavur fitg exacta. Bildquelle: RTR, Federico Belotti.
-
Bild 4 von 13. Tut quests mirs sitgs a Buorchas sur Bravuogn ha il Parc Ela bajegià e sanà. Bildquelle: RTR, Federico Belotti.
-
Bild 5 von 13. In dals mirs sanads. Bildquelle: RTR, Federico Belotti.
-
Bild 6 von 13. Bajegiar in mir sitg pretenda blera crappa cun differentas grondezzas e furmas. Bildquelle: RTR, Federico Belotti.
-
Bild 7 von 13. Tscherts craps dals mirs sitgs a Buorchas èn plirs tschients kilos grevs. Bildquelle: RTR, Federico Belotti.
-
Bild 8 von 13. Las medias e sponsurs èn stads envidads a Buorchas. Bildquelle: RTR, Federico Belotti.
-
Bild 9 von 13. Per mantegnair la biodiversitad n'èn las chaglias tranter ils dus mirs betg vegnidas allontanadas. Bildquelle: RTR, Federico Belotti.
-
Bild 10 von 13. Alfred Gantenbein, il manader da project Natira e Tgira da la cuntrada declera tge ch'il Parc Ela ha realisà a Buorchas sur Bravuogn. Bildquelle: RTR, Federico Belotti.
-
Bild 11 von 13. Dino Augustin lavura gia blers onns per il Parc Ela sco expert da mirs sitgs. Bildquelle: RTR, Federico Belotti.
-
Bild 12 von 13. Paolo Giacometti, il president dal Parc Ela. Bildquelle: RTR, Federico Belotti.
-
Bild 13 von 13. Vegnì a la preschentaziun è era il president communal da Bravuogn Filisur Luzi Schutz. Bildquelle: RTR, Federico Belotti.
Paolo Giacometti, il president dal Parc Ela ha ditg envers RTR, ch’i saja in’impurtanta incumbensa per in parc da natira da cultivar e mantegnair la cuntrada, ed uschia era ils mirs sitgs che sajan in element istoric. I valia da mantegnair questa perditga. E quai betg mo ord motivs ecologics, mabain era ord motivs istorics. Ils mirs raquintian ensemen cun la cuntrada ina istorgia ed i valia la paina da sa dar giu cun questa istorgia.
Mirs èn impurtants per la biodiversitad
A Bravuogn Buorchas èn ils davos onns vegnids sanads radund 265 meters mirs sitgs, sulet questa stad eran quai radund 80 meters. Ils mirs sitgs da Buorchas hajan gì diversas funcziuns, ha ditg Dino Augustin, expert da mirs sitgs dal Parc Ela. Entschet haja tut cun prender davent la blera crappa or da las pastgiras per avair dapli erva, e suenter hajan ils purs nizzegià la crappa per construir mirs che tegnan enavos il terren e per tegnair la via stabila.
En in auter lieu da Buorchas hajan ils mirs gì la funcziun da tegnair ensemen la muaglia cura che quella gieva d’in lieu en in auter. Ils mirs sitgs sajan impurtants era per ils animals, sco pitschens insects, rustgs, serps e mieurs, era dettia quai utschels che fetschian lur gnieus en las rusnas dals mirs, ha ditg Dino Augustin.
Era en l'avegnir vegnan sanads mirs sitgs
Il Parc Ela vegn a sanar era en l’avegnir mirs sitgs: Per ils onns 2020-23 planisescha il Parc Ela da sanar 1200 meters mirs sitgs, per part saja la finanziaziun gia garantida scriva il parc. Ils davos diesch onns ha il Parc ela investì 1.2 milliuns francs en ils mirs sitgs. 15% ha pajà il parc, il rest è vegnì finanzià dal maun public e da fundaziuns e sponsurs.