La stanza è pitschna, quatter maisas anticas e las sutgas tiers èn il cor dal Bachhuus. L'olma èn Carelia Joss e Torsten Rönisch. Carelia Joos ha ensemen cun ses um Thomas Egger surpiglià avant bun tschintg onns il local dals geniturs da Thomas. Oriundamain era quai ina stalla da chauras.
Cun enconuscher Tomas Rönisch dal temp en il Center Capricon Vargistagn ha Carelia Joos decidì da manar enavant l'ustaria. In ustaria tut speziala.
Regiun, stagiun e bio
Cun quels trais pleds sa lascha descriver fitg bain la filosofia dal Bachhuus. Per la scheffa è bio impurtant, ma nagina religiun.
Pli gugent d'enviern la salata da Realta che bio da la Spagna.
Bio saja tar els minimum 30% che vegn sin il plat, quai che dat ina staila da Bio Cuisine Suisse. Realisticamain fissan dentant schizunt dapli, uschia che duas da trais stailas fissan pussaivlas. «Bio è per mai nagina religiun» e perquai saja la regiunalitad e surtut la stagiunalitad prest pli impurtanta, di la pura, ustiera, mamma da dus mats, coordinatura e scheffa dal Bachhuus cun in surrir.
Temp e pazienza
El haja gudagnà temp e pazienza, resumescha Torsten Rönisch ils davos prest tschintg onns en la cuschina dal Bachhuus. Senza quella schanza e lavur e senza Carelia na fiss el probablamain betg pli en cuschina, resumescha l'um da Dresden. Qualitad saja adina stà in punct impurtant en sia lavur, ussa haja el er il temp e la musa per crear insatge cun quel temp. Ch'i dat en il Bachhuus mo tschainas ed in menu, quai saja il grond gudogn per tuts.
-
Bild 1 von 3. BioCuisine cun ina staila. Bildquelle: RTR.
-
Bild 2 von 3. Ina giada ina stalla da chauras. Bildquelle: RTR.
-
Bild 3 von 3. Il schef Torsten Rönisch en sia cuschina simpla e rudimentara. «La creativitad n'ha da far nagut cun apparaturas modernas». Bildquelle: RTR.