Dadora èsi anc stgir e daguts dattan cunter la fanestra da la pasternaria conditoria Casparin a Savognin. En la furnaria èsi ruassaivel e patgific – ma cura ch'ins va davos la teca e da stgala giu, svanescha quest ruaus.
En il plaun sut èn tschintg pasterners gia dapi las duas la damaun vid lavurar – ins vesa paunins sin plechs, turtas che vegnan preparadas e pasta che vegn tagliada.
Il furner che dat en il tun è Daniele Forino, in um grond cun egliers, che prepara sin in plech panettones per il furn. Ils panettones èn gia en lur furmas da chartun. Avant 10 onns ha Daniele Forino surpiglià la pasternaria conditoria Casparin ensemen cun sia dunna, raquinta el, entant ch'el taglia cun in pitschen cuntè ina crusch en la pasta e metta si in toc paintg.
L’emprim onn hai jau fatg 50 panettones – suenter adina dapli. 90, 100. E lura, l’onn passà, avain nus fatg 1'200 tocs.
Sia finamira per quest onn sajan 2'000 panettones, raquinta el. Uschespert ch'ina tola è finida, metta el ella sin in char, e prenda la proxima sin maisa. «Quai è ina pasta cun bler paintg», di el. «Qua è la temperatura en il furn fitg impurtanta.» Quai è il classic panettone – exact quel ch'ha gudagnà ina medaglia d'aur a la «Swiss Bakery Trophy» 2024 en la Svizra franzosa. Valitads èn vegnids la furma, il gust e la qualitad.
-
Bild 1 von 2Legenda: Daniele Forino taglia cruschs en la pasta cun in pitschen cuntè, entant ch'in collavuratur metta mintgamai in toc paintg sin quel. RTR
-
Bild 2 von 2Legenda: Suenter vegnan els gist en il furn. RTR
RTR preschenta mintga mesemna in’autra tratga per cuschinar suenter.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Dapi che ses panettone ha gudagnà ina medaglia d'aur, haja el survegnì massa gratulaziuns en stizun e dapli empustaziuns ch'avant, di Daniele Forino. Ma questa dumonda chaschuna er novas difficultads. Per far in panettone dovri numnadamain temp – bler temp.
Suenter quatter dis pon ins vender in panettone. Pia questa pasta qua, quella vegn en quatter dis en la butia.
La gronda part da quest temp dovra il panettone per ruassar. La pasta dovra l'emprim dapli che 14 uras ruaus en ina stanza chauda. Cura che la pasta è leventada, taglian ils pasterners ella en tocs e preparan per il furn. Daniele Forino lascha ils panettones en furn, enfin ch'els han exact 92 grads.
-
Bild 1 von 3Legenda: Cun in termometer controllescha il pasterner sch’ils panettones han gia cuntanschì 92 grads. RTR
-
Bild 2 von 3Legenda: Cura ch'ils panettones èn pronts, als prenda el or dal furn e metta en guglias per ch'el possia volver els. RTR
-
Bild 3 von 3Legenda: Il volver dat la furma als panettones. RTR
Ina giada che quai è il cas, prenda el or dal furn ils panettones – immediat savuri dultsch en l'entir local. Cun agid da dus collavuraturs metta el sin ina maisa ils panettones, metta guglias en las varts e penda alura si els uschia, ch'els pendan cun il chau engiu. Per 12 uras pendan els uschia, per ch'els survegnian la furma enconuschenta.
Cun volver ils panettones va l'umiditad giu e resta en il panettone – entras quai tegn la furma.
Daniele Forino lavura plain passiun ed il plaschair glischna sur sia fatscha durant raquintar. Il pasterner fa la proxima tola cun panettone, tals cun apricosas, e taglia e prepara els per il furnel – entant ch'ils auters volvan en la pigna ed anc auters ruaussan en il chaud.