Surses - La scola da Surses returna tar il surmiran

Ils emprims uffants che vegnan instruids en surmiran vegnan ad esser ils scolars da l’emprima classa primara da l’onn da scola 2021/22. Ils uffants ch’han gia cumenzà cun rumantsch grischun vegnan vinavant instruids en RG.

L’onn passà era vegnida inoltrada l’iniziativa populara per in return tar l’idiom surmiran sco lingua d’alfabetisaziun en la scola primara e superiura a Savognin. Dapi 13 onns vegn instruì rumantsch grischun en la scola da Surses. Il cussegl da scola e la vischnanca da Surses avevan recumandà da refusar l’iniziativa populara, las experientschas fatgas cun il RG sajan bunas.

Ils adversaris vesevan quai auter. Els han argumentà, ch'il rumantsch grischun saja ina lingua artifiziala ed indebleschia las cumpetenzas dal surmiran dals scolars.

Arguments pro e contra

Ina da las ultimas bastiuns

La gallaria mussa cun ina retscha da maletgs, tge vischnancas ch'han introducì il rumantsch grischun en scola – ed er tgeninas ch'han puspè midà enavos sin l'idiom.

Alvra e Lantsch decidan pli tard

Rumantsch grischun vegn era instruì en la Val Alvra, numnadamain en la scola primara a Lantsch ed en la scola superiura a Casti. Là recumonda il cussegl da scola da dir gea a l’iniziativa che vul reintroducir il surmiran en scola. Da las vischnancas Albula/Alvra e Lantsch na datti nagina posiziun uffiziala.

Las radunanzas communalas da Lantsch ed Albula/Alvra decidan ils 28 d'avust. Ils 19 d'avust datti anc ina infurmaziun publica. A Savognin è quella stada il zercladur. La vischnanca ha laschà registrar l'infurmaziun cun discussiun da podi.