L’investider tschec Jan Michal che s’engascha era per las pendicularas da Spleia, ha gronds plans. En tut investescha el radund 15 milliuns francs al ur da la vischnanca da Spleia. Il project «Speluca» – uschia vegn Spleia numnà en las emprimas funtaunas scrittas – cumpiglia pliras parts: In hotel cun wellness, ina nova bieraria, in’ustaria cun iert da biera, alloschis da vacanzas en ina veglia susta e sur la bieraria, creà dals architects da Tusaun Ivano Iseppi e Marco Ganzoni.
Lavur per 30 persunas
Sco quai ch’il manader da project da la «Speluca Brauerei & Genusshotel» Christian Weissenbacher ha ditg envers RTR, s’avanzia il project tenor plan. Sco emprim veglian ins avrir la bieraria quest enviern. En quella vulan ins crear diversas sorts da biera. Ins haja gia chattà in maister-bierer tudestg cun experientscha ed ina giuvna dunna tscheca che fineschia proximamain la scolaziun da maistra-bierera.
-
Bild 1 von 7. Ils tancs da la nova bieraria èn pronts. Bildquelle: RTR.
-
Bild 2 von 7. Quai vala er per las buglieras. Bildquelle: RTR.
-
Bild 3 von 7. La bieraria ha aparaturas modernas. Bildquelle: RTR.
-
Bild 4 von 7. Christian Weissenbacher è il manader da project da la «Speluca Brauerei & Genusshotel». Bildquelle: RTR.
-
Bild 5 von 7. En il bajetg verd nov sa chatta la bieraria. Sisum datti intginas abitaziuns da vacanzas. Bildquelle: RTR.
-
Bild 6 von 7. Il hotel Pratigiana vegn acrtualmain renovà. Bildquelle: RTR.
-
Bild 7 von 7. Qua datti l'ustaria dal hotel Pratigiana. Bildquelle: RTR.
La primavaira duess alura avrir il hotel Pratigiana ch’era serrà ils davos onns e vegniva il davos nizzegia sco center per requirents d’asil. Weissenbacher quinta ch’ins vegnia a duvrar la fin finala radund 30 persunas che lavurian per il hotel e la bieraria.
Resort da vacanzas grond
A Spleia datti actualmain anc auters projects ch’èn en planisaziun. Il pli grond è in resort da vacanzas che duess vegnir construì tenor ils plans dals architects da renum Herzog e de Meuron.