Cun l’emprima siglientada han entschet oz las lavurs dals miniers. Quellas cuzzan radund in onn e mez, il tunnel da drenascha vegn ad avair ina lunghezza da 650 meters. Or dal tunnel vegnan fatgas diversas perfuraziuns en il crap, per pudair drenar igl terratsch. Ils geologs speran, che quellas mesiras gidan da sbassar la pressiun da l’aua, tge che pudess stabilisar il terratsch che glischna. Actualmain glischna la vischnanca da Brinzauls per radund 1,5 meters ad onn.
Ils custs per la construcziun dal tunnel muntan a 14 milliuns francs. 90% pajan la Confederaziun ed il chantun, il rest pajan la vischnanca Albula/Alvra ed ils possessurs da l’infrastructura publica.
En ina pitschna festa ha il president da la regenza Mario Cavigelli stimà la lavur da la politica ed ils involvids en il project. Il plevon Don Federico ha benedì la figura da la Sontga Barbara, che vala sco sontga patruna dals miniers.
