Tge èn las grondas sfidas en connex cun l'evacuaziun da Brinzauls?
Christian Gartmann: Ils umans a Brinzauls èn ferms ed enconuschan la mesiras d'evacuaziun, cunquai ch'els han gia stuì bandunar l'onn passà lur dachasa. Questa giada è la situaziun pli tendida. Diversas dumondas na pon ins betg respunder e quai chaschuna malsegirtads. Nus dal stab da crisa empruvain da respunder uschè bleras sco pussaivel – savens mancan dentant er a nus las respostas.
Tge fa uschè pesant la situaziun per abitantas ed abitants?
Il patratg da puspè stuair bandunar il dachasa e questa giada per in temp intschert. Ils umans sa sentan exposts a la situaziun e dictads d'insatgi auter. Sche la natira sforza da bandunar insatge, è quai ina gronda chargia emoziunala.
Bleras persunas sa preparan sin quai ch'ellas pon pli ditg betg returnar.
Co sustegna il stab da crisa ils carstgauns en questa situaziun?
Noss team porscha regularmain occurrenzas d'infurmaziun cun updates da la situaziun e nua ch'abitants pon tschentar dumondas. I dat er ina hotline ch'è adina cuntanschibla. Plinavant lavura il stab da crisa stretg cun il chantun ed ils servetschs socials per gidar las persunas uschè bain sco pussaivel en questa situaziun extraordinaria.
Tge sustegn finanzial datti per persunas pertutgadas?
Il chantun porscha agid immediat e cuvra ils custs d'evacuaziun. Bleras e blers sa dumondan dentant tge che capita sch'ellas na pon betg pli returnar. Spezialmain per purs che ston dischlocar lur muvel è quai ina sfida. In manaschi puril na pon ins betg metter ord funcziun, animals dovran cuntinuadamain tgira e provediment.
Pensais Vus che las persunas evacuadas pon returnar bainprest a Brinzauls?
La speranza è qua che la situaziun sa stabilisescha, ma quai po durar mais. Bleras persunas sa preparan sin quai ch'ellas pon pli ditg betg returnar.
Co vesais vus il futur dal vitg sch'il privel da bovas e crudada da crappa resta vinavant?
Quai è ina dumonda che nus ans tschentain en il stab da crisa ed en il vitg. Brinzauls è pitschen e blers abitants han qua lur ragischs. A lunga vista stuain nus sco societad ans dumandar sche e co abitar en zonas periclitadas duai esser pussaivel. Per las famiglias è quai in dir patratg, perquai ch'ellas na vulan betg dar si lur dachasa e lur ragischs.
Co vegnan ils umans d'ir enturn cun questa malsegirtad?
I dat fasas nua che las persunas èn frustradas e communitgeschan er quai. Quai è chapibel ed er part dal process. Nus sco stab da crisa empruvain da recepir questas emoziuns e tractar quellas. Ina gronda part da nossa lavur è da porscher sustegn psicologic. Nus savain ch'igl è impurtant per las persunas pertutgadas dad esser udidas e survegnir infurmaziuns cleras.
Tge pon las autoritads e la societad emprender da questa situaziun?
I sa mussa che nus en Svizra stuain esser preparads meglier per tals privels natirals. La midada dal clima intensivescha tals eveniments. Questa situaziun mussa che nus stuain reagir pli svelt e da moda coordinada sche persunas ed existenzas èn en privel.
Il discurs ha Sandra Schiess da SRF 1 fatg.