Ils 28 d'october è stada l’emprima badigliada da la nova scola Grava. Per passa 25 milliuns francs datti qua ina nova scola. Las proximas dus emnas vegn sbuvà il bajetg da la scola da l’onn 1954. En tut vegnan construids dus novs bajetgs da scola cun ina plazza da sport tranteren. La sala polivalenta existenta vegn modernisada. Durant la staziun d’enviern na vegn betg lavurà. Las lavurs da construcziun brutta duain cumenzar l’avrigl da l’auter onn. Averta duess la nova scola vegnir l’avust da l’onn 2026.
Asbest e Radon han fatg quitads
Sco quai che l’architect Andreas Ruch da l’interpresa Ruch & Partner ha ditg, saja stà ina sfida d’allontanar l’asbest or dal bajetg vegl, ma ussa saja la veglia scola pronta per vegnir sbuvada senza privel. Mesiras dovria quai era pertutgant il gas nuschaivel en la terra Radon: Cun mesiras da construcziun saja il nov bajetg aifer las limitas lubidas.
Il scolast sa da raquintar
Regurdientschas ha l'anteriur scolast Gionign Arpagaus. El ha passentà pli che 50 onns da sia vita en la scola ch'è uss sbuvada. Trais onns avant ch'el è naschì ha la vischnanca laschà construir il bajetg. E Gionign Arpagaus è stà in dals emprims scolarets là. Pli tard è el lura returnà, cun il diplom da scolast en la giaglioffa.
Divers lieus da scola il mument
Fin che tut las lavurs èn a fin datti ina soluziun speziala per las scolaras ed ils scolars dal Surmeir. La scolina è en la villa Aurora a Savognin, l’emprima fin la terza classa va da nov a Salouf a scola, la quarta classa e las trais classas superiuras van a scola a Barnagn, e la tschintg- e sisavla classa vegn instruida a Naloz en l'anteriura chasa communala a Savognin.
