La radunanza communala ha approvà ils set da november la revisiun parziala da la planisaziun locala. Igl è previs che l'uschenumnà flowtrail po vegnir bajegià la primavaira da l’onn proxim. Las organisaziuns da l’ambient avevan recumandà da refusar il Parnoztrail, tranter auter perquai che la giaglina selvadia viva en il conturn. La vischnanca da Surses refusa la critica ed argumentescha ch’il Parnoztrail saja ordaifer il reservat da guaud spezial, la giaglina selvadia na vegnia betg disturbada. Sco quai che Linda Netzer, la manadra dal svilup da la vischnanca Surses ha ditg, sa tractia quai d'in bun project che saja vegnì discutà cun tut ils planisaders ed era cun l'Uffizi da l'ambient Grischun. I saja in project che saja vegnì preparà minuziusamain.
Ulteriurs projects da bike sur cunfin
Il Parnoztrail è mo in da trais projects pli gronds en la regiun. Actualmain examinescha la vischnanca da Surses era la pussaivladad da realisar in trail da Somtgant a Tigignas. Plinavant è Surses en contact cun Silvaplana: Las duas vischnancas vulan realisar ina ruta da bike sur il Pass dal Güglia. Il mument ston velocipedistas e velocipedists ir sur la via naziunala che vala sco via privlusa per bikers.
