L’occurrenza è vegnida organisada da l’uniun da mastergnants HGV Surses en collavuraziun cun la scola Surses. Gia avant la pandemia aveva l’Uniun da mastergnants e commers Surses gì l’idea da realisar quella occurrenza. Pervi da las mesiras da corona n'è quai la finala dentant betg stà pussaivel.
L’idea è restada e mardi saira è ella lura daventada realitad. En curts referats han las firmas preschentà lur emprendissadis ch’els porschan, e vi da divers stans èsi lura era stà pussaivel da far dumondas davart las professiuns, e da contemplar objects exponids.
-
Bild 1 von 3Legenda: Durant la preschentaziun en scola Barnagn a Savognin. RTR -
Bild 2 von 3Legenda: L'emprendista Soraya Rolli e Ramona Stgier dal Center da sanadad han preschentà las professiuns da sanadad che la chasa da vegls e l'ospital center porschan. RTR
-
Bild 3 von 3Legenda: Qua è vegnì preschentada la professiun dal bostger. RTR
Dapli firmas ed perspectivas en la regiun
Che 20 novas firmas èn dacurt naschidas en la val mussa, ch'i exista era in basegn per lavurers e lavureras. Las firmas regiunalas schazegian la pussaivladad da pudair preschentar als scolars e las scolaras superiuras lur interpresa. Tenor Mitgel Arpagaus – che maina ina scrinaria a Contern – saja la schanza numnadamain buna, ch'ils giuvens e las giuvnas ch'absolveschian in emprendissadi tar ina fatschenta, restian era suenter vinavant tar quella.
Insatge per mintga gust
Igl è ina diversa paletta d'emprendissadis ch'èn vegnids preschentads da las firmas al «mini fiutscher» mardi saira. Per part er emprendissadis che n'èn betg fitg enconuschents, sco per exempel quel dal mecatronist da pendicularas u constructur da vias. Ma era emprendissadis or da secturs sco sanadad, automobil u selvicultura eran part da la presentaziun. Quella diversitat mussa ch'i exista pia era perspectivas per differents gusts u interess.
La scola superiura ha tratg in positiv fazit davart l'emprima exposiziun da commerci «mini fiutscher». Per Florian Szobec, co-mainascola, è cler: Ina tala saira duai davent ussa dar regularmain suenter las vacanzas d'atun.