Salouf - Exchavà in stgazi dal temp da bronz en il Surses

Al pe da la culegna preistorica Motta Vallac en vischinanza da Salouf ha il Servetsch archeologic dal Grischun scuvrì l'atun 2022 80 objects dal temp da bronz tardiv. Sco ch'il Servetsch archeologic scriva, saja quest uschenumnà deposit il pli grond ed impurtant fin ussa en il Grischun.
Ils origins dals differents objects vegnan ussa perscrutads.

Motta Vallac

En il rom dal project da perscrutaziun «CVMBAT» è vegnì scuvert l'atun 2022 cun agid da sondas da metal tar Salouf in deposit dal temp da bronz. Deposits consistan d'objects da valur, per il solit da metal, ch'èn vegnids deponids, sutterrads u zuppads aposta. Il chat sco tal è vegnì fatg a Vostga, en ina cultira ch'è situada al sid da la culegna preistorica impurtanta Motta Vallac.

20 kilograms, 80 objects

Il Servetsch archeologic Grischun ha stgavà, documentà digitalmain e conservà tut en tut 80 objects da bronz cun in pais total da var 20 kilograms. La gronda part dals objects èn tocs e fragments d'arom. Il deposit cumpiglia dentant er farclas, pliras sigirs, fragments d'ina resgia sco er tocs da bischutaria e da costums. Tenor las analisas d'enfin ussa èn tut ils objects vegnids pachetads en tgirom e lura deponids en la terra en ina chascha da lain. Tenor dataziuns derivan ils objects dal temp da bronz tardiv, pia dal 12./11. tschientaner a.C.

Or da l'archiv