Il terren a ed enturn Brinzauls cuntinuescha a sa mover. Las spertads en l'entir territori da la sbuvada sezza èn sin in aut nivel, cun ina leva tendenza da prender giu. En il vitg èn las spertadads constantas fin lev creschentas. Il territori dal vitg da Brinzauls sa mova il mument cun ca 1.45 meters ad onn, tge ch’è 5 centimeters dapli ch’anc avant in mais. Constants èn ils moviments tar l’uschenumnada insla amez la bova. Là sa mova il terren il mument per 10 meters ad onn.
Uss cun la stagiun fraida e bletscha stoppian ins quintar cun novs augments da spertadad, scriva la vischnanca Albula/Alvra en ses bulletin actual. E tar plievgia e naiv, u cura che naiv liua – saja pussaivel che dapli crappuns sa schlian or dal rutsch e vegnian a val.
