La vischnanca saja vegnida infurmada entschatta settember cun ina brev recumandada d'ina gruppa da tschintg uffiziers dal corps da pumpiers da Tusaun «il commando u nus», resumescha il president communal da Tusaun Curdin Capaul il punct da partenza. La gruppa n'haja dentant mai tschertgà ordavant il discurs cun il commando, cun la cumissiun da pumpiers u cun la suprastanza comunala. Uschia na sappian els anc oz betg tge renfatschas concretas che la gruppa fetschia. Protocollà na saja era nagin cumportament sbaglià. Er in inscunter suenter la brev n'haja purtà nagins indizis ed uschia haja la suprastanza acceptà l'offerta dals uffiziers e decidì cleramain per il commando dals pumpiers da Tusaun. Quel fetschia ina fitg buna lavur. In tal cas ed agir n'haja el anc mai gì, ha Capaul ditg. El sja fitg trumpà.
Servetsch da pumpiers betg pertutgà
Impurtant saja da savair ch'il servetsch dal corps funcziunia e saja garantì, sincerescha Capaul. Per Conradin Caduff, il manader pumpiers da l'Assicuranza d'edifizis dal Grischun ed uschia il pli aut pumpier chantunal n'è l'agir dals uffiziers betg resuandabel. Er els na sajan betg vegnids infurmads ordavant. D'in uffizier da pumpiers avess el spetgà in auter agir en ina situaziun da malcuntentienscha. In corps da la grondezza da quel da Tusaun haja dentant avunda candidats e persunal per stuppar foras – i drova dentant temp.